Oraindik merkatuan ez dauden berrikuntzetara inbertsio handirik egin gabe sartzea, berrikuntza horiek garatzen dituzten startupei aukera emanez jada finkatuta dagoen konpainia batean probatzeko, egunen batean bezero izango direnen profilera egokitzen den konpainia batean. Hori da Venture Clienten gakoa, enpresa handien eta gorabidean dauden beste batzuen arteko harreman eredua, Gregor Gimmy Deustuko Unibertsitateko Business Innovation Program programako irakasleak aste honetan lnnobasqueren bulegoetan egindako jardunaldi batean azaldu duenez. Eredu horrek gero eta protagonismo handiagoa hartzen du berrikuntza irekiko estrategietan, eta interes handikoa izan daiteke ekosistema ekintzaile sendoa duten ekonomietan, hala nola Euskadikoan.
Gimmyk 2014an garatu zuen eredu hori, BMW enpresan egindako lanean oinarrituta. Enpresa horretan, startupek garatutako teknologiak txertatzeko programa bat ezarri zen, erosketa prozesu baten bidez, non produktuen bertsio goiztiarra (baita prototipoak ere) erosten zuen, negozio unitateek berehala probatzen zutena. Hau da, benetako ekoizpen-prozesu batean.
Gregor Gimmyren iritziz, lehiarako abantaila jasangarriak eraikitzeko baliabide estrategikorik garrantzitsuena teknologia den une honetan, enpresa bakoitzak erabaki behar du zer teknologia garatu behar dituen barruan eta zeintzuk eskuratu edo garatu ditzakeen kanpoan, kanpoko eragileekin lankidetzan. Horrela, Venture Client ereduak enpresa handiei ohartarazten die ekosistema ekintzailearen eta haren startupen jarraipena funtsezko konpetentzia bihurtu behar dutela beren erakundeen barruan. Kontua ez da bi mota horietako enpresen artean lankidetza finkoak ezartzea, baizik eta Venture Client unitateak ezartzea, prozesu egituratu eta baliozkotuen bidez korporazio handiek startupen gaitasuna aprobetxatu ahal izan dezaten arazo eta erronka zehatzak konpontzen lagunduko duten soluzio teknologiko aurreratuak azkar sortzeko.
