Azaroan eta abenduan, Euskadiko 24 ikastetxetako 800 ikasle inguruk 37 bisita gidatu egin dituzte zortzi gune arkeologiko eta museotan, gune horiek ikasketa praktikorako egiazko eremu bihurtuz. FIRST LEGO League Euskadi programaren 17. ekitaldiari lotutako jarduerak izan dira.
Programaren 2025-2026 denboraldian, “UNEARTHED – iragana aztertzea etorkizuna eraikitzeko” da ardatza eta goiburua. Xedea da gazteak zientzia eta berrikuntza erabiltzera animatzea, horren bidez historia ulertzeko. Testuinguru horretan, ikasleek Munduko Ondare izendatutako haitzuloak esploratu dituzte, indusketarako eta kontserbaziorako teknikak ikasi dituzte, jatorrizko aztarnak aztertu dituzte eta egunerokoan ikerkuntzan jarduten duten profesionalekin hitz egin ahal izan dute.
FIRST LEGO League Euskadi programaren hezkuntza-helburua ez da mugatzen edukien transmisiora; Lehen eta Bigarren Hezkuntzako eta Batxilergoko ikasleen artean bokazio zientifiko-teknologikoak sortzea da xede behinena, horretarako esperimentazioa, sormena eta bizipenen bidezko ikasketak baliatuz. Izan ere, bisita horiek aukera ematen dute XXI. mendean funtsezkoak diren konpetentziak garatzeko, hala nola pentsamendu kritikoa, talde-lana eta ikerketarako gaitasuna. Orobat, bisitaldi horien bidez, ikasleek ikusten dute zientzia eta teknologia irisgarriak bezain zirraragarriak izan daitezkeela. Hala, bisitaldi horietan, Santimamiñen, Euskal Herriko labar artea esploratu zuten; Iruña-Veleian erromatarren garaiko eguneroko bizimodua nolakoa zen jakin zuten; eta Ekainberrin, Historiaurreko teknikak esperimentatu zituzten –sua piztea edo margotzea, besteak beste– eta Ekaineko haitzuloaren erreplika ezagutu zuten.
Euskal ondarearen ikerketan eta hedapenean lanean diharduten erakundeen laguntzari esker gauzatu ahal izan da ekimena. Laguntzaile izan dira Aranzadi Zientzia Elkartea, Ekainberri, Bizkaia eta Gasteizko arkeologia museoak (BIBAT), Bilboko Berreginen Museoa, Santimamiñeko kobazuloa eta Iruña-Veleiako erromatar aztarnategia. Gune horietako arkeologoek, kontserbatzaileek, gidariek eta ikertzaileek beren esperientziaren berri eman diete ikasleei, eta dibulgazio zientifikoak duen balio soziala indartu eta balioan jarri dute.
Innobasque, Berrikuntzaren Euskal Agentziako lankidetza-sare zabala osatzen duten eragileen eskutik gauzatu da ekimena. Sare horretan lankide dira hiru euskal unibertsitateak, Eusko Jaurlaritza eta foru aldundiak, baita ondarea belaunaldi berriei erakusteko lanean diharduten museoak eta arkeologia-zentroak ere.
Udazkenean egindako jarduerak FIRST LEGO League Euskadi programaren lehen fasea izan dira. Programa bera 2026ko otsailaren 28an bukatuko da Bilbon, Donostian, Arrasaten eta Gasteizen aldi berean egingo den torneo batekin. Taldeek LEGO® robotak diseinatu dituzte deialdi honetako misioari erantzuteko, eta lehia horretan, epaimahai baten aurrean aurkeztuko dituzte bai robotak eta bai aurtengo erronkari lotutako berrikuntza-proiektuak. Ikasle askorentzat, jakin-mina, sormena eta espiritu ikertzailea pizteko esperientzia izan da FLL Euskadi, eta torneoa esperientzia horren itxiera bihurtzen da.
