Azaroan, DBHko 4. mailako 766 ikaslek parte hartu dute STEAM Sarek antolatutako STEM orientazio jardunaldietan. Sare horrek ikastetxeak eta eragile sozioekonomikoak konektatzen ditu, euskal gazteek zientziarekiko, teknologiarekiko, matematikarekiko eta berrikuntzarekiko duten interesa sustatzeko, batez ere nesken artean.
Bizkaian eta Gipuzkoan egindako zortzi saioetan, ekimenak STEM eremuko 17 ikastetxe eta 143 profesional (Zientzia, Teknologia, Ingeniaritza eta Matematika) bildu ditu. Topaketak “hitzordu azkarren” formatuan egin dira. Formatu horretan, ikasle bakoitzak 4 edo 5 profesionalekin hitz egin ahal izan du, eguneroko ibilbideak eta erronkak ezagutu ahal izan ditu, eta etorkizun akademikoari eta profesionalari buruzko zalantzak argitu ahal izan ditu. Horrela, ekimenak ikasleak mundu profesionalera hurbiltzen ditu, STEM lanbideen aniztasuna erakusten du eta bokazioak sustatzen ditu.
Eusko Jaurlaritzaren STEAM Euskadi Estrategiaren esparruan laugarren urtez jarraian antolatu dira jardunaldiak, eta Zientzia, Unibertsitate eta Berrikuntza Sailak eta Hezkuntza Sailak sustatu dituzte, Berrikuntzaren Euskal Agentziarekin, Innobasquerekin eta Deustuko Unibertsitatearekin, EHUrekin, Mondragon Unibertsitatearekin, Hetelekin, Ikaslanekin eta AICE-IZEArekin elkarlanean.
Enpresa eta hezkuntza hurbiltzea
STEAM Sare hezkuntz zentroen eta eragile sozioekonomikoen sarea da (enpresak, unibertsitateak, zentro teknologikoak eta STEM profesionalak dituzten beste erakunde batzuk), bokazio zientifiko-teknologikoak sustatzeko elkarrekin lan egiten dutenak. Ikasturtean zehar, hainbat jarduera antolatzen dituzte, hala nola orientazio profesionaleko jardunaldiak, ikasleak arlo zientifiko-teknologikoetan lan egiten duten profesionalekin harremanetan jartzeko. Horrela, ikasleek Euskadin egunero lan egiten duten arlo zientifiko-teknologikoko enpresa eta zentro teknologikoen praktika profesionalak ezagutzea sustatzen du, enpresa eta erakunde horien lantokietara bisitak eginez. Ikasturte honetan 17 ikastetxek eta 102 erakunde laguntzailek hartuko dute parte, eta hezkuntzaren eta lan-munduaren arteko lotura indartuko da Euskadin.
