Urtarrilak 22, 2022

Santander bankuan 30 urtez izan dudan esperientzia pertsonal eta profesionala oinarri hartuta, enpresa-kulturako funtsezko elementutzat hartzen dut berrikuntza. Batzuetan erdi ezkutuan edo oharkabean azaleratzen da, baina beti hor dago.

Berrikuntza oso loturik dago lantaldean sarri partekatzen ditugun lau ideiarekin. Hauek dira ideia horiek: bezeroarekiko obsesioa, pertsonen garrantzia, aurrerapena helburutzat hartzea eta aniztasuna baliozko pentsamendu gisa.

Lau giltzarri horiek azaldu nahiko nituzke, eta ez garela teoriaren eremuan geratuko ziurtatzeko zenbait adibide praktiko jarriko ditut, horien bidez estrategia eta berrikuntzaren kultura nola bihurtzen diren ekintza azaltzeko.

Bezeroarekiko obsesioa

Ez zait bururatzen kontsigna horretatik jaio ez den produkturik edo prozesu berritzailerik. Bezeroengandik gertu egotea, haiei entzutea, abiadura handiagoa hartzea eragozten duen arazoa zein den edo stopper-ak zein diren ulertzea, hori da ideia handien sorburua eta abiapuntua. Ideia handi horiek berrikuntza ekartzen dute gerora, eta beti-beti-beti dute saria.

Transakzio komertzialen eta finantzen munduan, seguru asko historian zehar izan den berrikuntza handiena kalkulagailuen eta ordenagailuen eskutik etorritakoa izango da.

Santanderren kasuan, ordaindutako kontuak berrikuntza ausarta izan ziren. Horien eskutik bankuak aukera izan zuen besteengandik bereizteko eta 1990eko hamarkadan Espainian eta 2000ko hamarkadan Erresuma Batuan modu esponentzialean hazteko. Une hura aspaldikoa iruditzen zaigu orain eta ahaztua dugu, interes-tasa negatiboen testuinguruan, baina hura bultzatu zuen espirituak bizirik jarraitzen du, jarraitzen dugu bezeroei entzuten eta berrikuntza sortzen, 150 milioi bezero baino gehiagorengandik hurbil egonez.

Hala, gazteenei entzunda, Work Café bulegoak sortu ditugu Santanderren. Bezero horiek ez zuten gogoko ohiko banku-bulegoetara joatea, eta haien aldean bestelako gune batzuk eskatzen zituzten: bezeroentzako eta bezero ez direnentzako espazio irekiak eta doakoak, kafe bat hartzeko, ekintzaileekin edo ETE-ekin hartu-emanak izateko, negozio-bilera bat egiteko edo ekitaldi batean parte hartzeko.

Garrantzitsuena da bulego-eredu hori gazteenentzako erreferentzia bihurtu dela gaur egun. Gazteek gustuko dituzte, eta networking-erako eta negoziotarako egiazko gune bihurtu dira bezeroentzat eta Santander bankuarentzat.

Esandakoa, entzuteak eta hurbil egoteak berrikuntza sortzen du, eta, gainera, merezi du.

Pertsonen garrantzia

Bizi garen munduan teknologia da jaun eta jabe. Munduan kapitalizazio handiena duten hamar konpainiatik zazpi teknologikoak dira.

Egia da berrikuntza teknologikoek aukera ematen digutela aurrerapausoak azkarrago emateko eta erraztu egiten digutela bizimodua; alabaina, azpimarra egin nahiko nuke berrikuntza teknologiko handi guztien atzean pertsona bat dagoela, pertsona horrek eman diola zentzua eta bultzada berrikuntza horri.

Horregatik da hain garrantzitsua lehentasunak beti hurrenkera egokian jartzea, teknologia beti pertsonen zerbitzura egon dadin eta ez alderantziz.

Areago, uste dut teknologia pertsonen gainetik jartzen duten enpresak oso sendoak iruditzen zaizkigula epe laburrera, baina oso zaurgarriak direla epe ertain eta luzera,

galdu egiten dutelako berrikuntza bultzatzen duen muin-muineko espiritua. Gainera, teknologia kopiatu eta erosi egiten da; pertsonak, aldiz, gure bertute eta akats guztiekin, baita kultura bera partekatzen dugunean ere, ez gara hain erraz erreplikatzekoak.

Bi munduak uztartzeko, premiazkoa da makinekin hitz egiteko erraztasun handiena duten pertsonak zaintzea, baina baita beste pertsonekin hitz egiteko eta konektatzeko erraztasun handiagoa duten pertsonak zaintzea ere.

Hain zuzen, dagoeneko bada beharrizan horrekiko kezka, eta enpresak hasiak dira bi hizkuntzak hobekien ulertzen eta hitz egiten dituzten pertsonak berenganatzeko lehian, hori talentu kotizatuena.

Santander unibertsitateak ekimenaren bidez oso agerian geratu da hori. 25 urte baino gehiago dira talentuari laguntzeko programak egiten ditugula, mundu zabaleko 1200 unibertsitate baino gehiagorekin, eta enpresa-unibertsitatea lankidetzan oinarritutako hartu-eman hori guztiz berritzailea izan da. Zorionez, beste askok gure urratsei jarraitu diete gerora.

Aurrerapena helburu

Berrikuntza orok, zentzua izango badu, onuragarri izan behar du pertsonen eta enpresen aurrerapenerako. Egunez egun gero eta gehiagok adierazten dugu gure seme-alabentzako etorkizun oparoago eta iraunkorrago baten alde lan egiteko konpromisoa, oparotasuna eta iraunkortasuna gizartearen, lanaren eta ekonomiaren ikuspegitik ulerturik.

Santanderren lan eginez gero, erabat zentzuzkoa da hori; izan ere, zorionez, hartu-eman estuan gaude hango eta hemengo eta hainbat sektore ekonomikotako enpresekin eta profesionalekin.

Gaur egun, pandemiaren ikasketatik gatoz eta bi urteotan askok oroitzen dituzten erronkarik handienei egin behar izan diegu aurre. Hala, testuinguru honetan, zalantza nagusitu zaigu gure bizitzetan, eta geratzeko etorri da.

Hori dela eta, inoiz baino garrantzitsuagoa da, lehenik eta behin, oparotasun eta aurrerapen mailak modu masiboan goratzeko helburua argi izatea, eta bigarrenik, zapaltzen ari garen lurrari oso itsatsita egotea, zerumugari begiratuz, etorkizunari aurre hartzen saiatuz, baina oinak lurrean ditugula eta unean uneko egoeraren irakurketa oso hurbiletik eginez. Helburu hori ondo beteko bada, lehen puntua bete behar da halabeharrez: Hurbiltasunarekiko obsesioa eta bezeroari modu aktiboan entzutea.

Europako eta Espainiako oparotasunaren ikuspegitik, ETE askok Europako laguntza publikoetan dituzte jarrita itxaropenak. Hein batean, bankuak ere laguntzen du aurrerapen horretan, bezeroen eta ez-bezeroen esku doako tresna bat jarri baitu, profesional edo enpresa guztiek aukera izan dezaten tokian bertan, estatuan edo Europan azkar eta erraz eskura ditzaketen 5 laguntzen berri modu intuitiboan kontsultatzeko.

Lankidetzarako ekimen berritzaile hori ere, zorionez, bere egin dute beste erakunde askok; izan ere, orain, gure lehentasuna laguntza horiek ahalik eta azkarren ETE-ei iristea da, eta ez dio hainbeste axola zein plataformaren bidez iristen diren laguntzetara.

Orobat, ETE-en ikuspegitik eta haien nazioartekotzea bultzatzeko helburuaren ikuspegitik, beste bi berrikuntza teknologiko sortu dira berriki: GPI Tracker eta Salgaien GPI Tracker. GPS teknologiari esker, gure bezeroek uneoro dakite non dauden beren diru-funtsak nazioarteko ordainketetan, eta ez dute 7-10 egun itxaron behar, inolako informaziorik gabe eta zalantzaz beterik. Salgaien GPI tresnak edukiontzi guztiak monitorizatzen ditu, eta garraio-konpainia guztiak leku bakarrean eta unean bertan biltzen ditu. Balio handiko tresna da; izan ere, ETE-etako zuzendari guztiek larridura handiz bizi izan dute hornidura-kateen nondik norakoen jarraipena eta lehengaien garraioari buruzko informazio eskasia.

Tresna ez oso konplikatuen adibideak dira bi-biak, baina sektorean ez zegoen hori konponduko zuen tresnarik, eta Santanderrek soluzio teknologiko guztiz berritzailea jarri du enpresen eskura.

Aniztasuna baliozko premisa gisa

Azken puntu hau gehitu dut, nire iritziz ezinezkoa baita berritzea ez badago pertsonentzako ingurune ireki bat, “leku seguru” bat non pertsona guztiak onartuak izango diren, nahiz eta ez bat etorri prototipo edo estereotipo ohikoenekin edo sare sozialek, telebistak, komunikabideek eta abarrek gehien bultzatzen dituzten estandarrekin.

Besteekiko errespetua funtsezko balioa da pertsona bat aske senti dadin iritzia emateko eta seguru senti dadin bere buruarengan sinesteko, hute egiteko, berriro hasteko eta sortzeko eta beste batzuk animatzeko. Ekintza txikiek suntsitu egin dezakete berrikuntza: iruzkin bati eginiko kritika batek, izateko edo adierazteko modu jakin batek, irain batek, ekintza soil batek edo ez ezer egiteak…

Ekosistema berritzailea, sendoa eta parte-hartzailea eraiki nahi badugu, funtsezkoa da gizabanako garen aldetik, aniztasuna bultzatzea, bai maila pertsonal eta familiarrean, bai maila profesionalean, oso funtsezko balioak dira, baina babestu eta bizirik mantendu behar dira, gainerakoan ezin baita ingurune egoki bat bideratu sormenerako, bezeroengana hurbildu ahal izateko, enpresa eta erakundeekin bat egiteko eta aurrerapenaren eta oparotasunaren helburuak lortzeko.

Azken lerro hau baliatu nahiko nuke Santanderrek eta nik neuk aniztasunaren alde agertutako konpromisoa berresteko, aniztasunaren alde oro har eta genero-aniztasunaren alde bereziki, baita pertsonei eta enpresei hazten laguntzeko lanean jarraituko dugula berresteko ere. Atzera begiratzen badugu, asko eraiki dugu, baina oraindik gehiago egin dezakegu, gehiago berritu dezakegu eta elkarlanean gehiago jardun dezakegu.

Deusto Social Lab-eko kide naizen aldetik, asko gustatzen zait nola definitzen duten berrikuntzaren aldeko konpromisoa eta bultzada, “Transforming Our World Together” goiburuarekin.Mundu zabaleko 200 unibertsitate jesuitak 2018an Bilbon eginiko topaketa batetik hartua da lema hori.

Askotan baliatzen dut mezu hori indarberritzeko premia dudanean, eta zuekin guztiekin partekatu nahi nuen, sinesten, egiten eta amesteko eta hazten jarraitzeko inspirazioa bilatzen duzuen guztiokin. Jarrai dezagun!

Urtarrilak 13, 2022

2015eko uztailean, Hong Kong-en, spintronikari buruzko workshop batean, nanoGUNEko Fèlix Casanova Ikerbasque ikertzaileak Intel korporazioko Sasikanth Manipatruni doktorearekin hitz egin zuen elektroien spin-orbita akoplamenduaren inguruan. Manipatruni-k, ikerketaren arlo honetan aitzindariak garela ikusita, elkarlanerako lehen saiakera batzuk egitea proposatu zion Casanova-ri. Ordutik hona, Intel-ek –zirkuitu integratuen fabrikatzaile handienak– gure ikerketaren zati bat finantzatzen du. Ikerketa horren helburua ez da gaurko zirkuitu integratuak hobetzea; ikerketa hori etorkizuneko zirkuitu integratuei begira egiten ari gara, elkarrekin paradigma berria garatuko dugulakoan. Intel-ekoek ez dakite etorkizuneko zirkuitu integratuak nolakoak izango diren; baina susmoa dute dauden aukeretako bat spin-orbita akoplamenduaren ikerketaren eskutik etor litekeela eta, arlo horretan onenen artean gaudenez, gurekin lan egin nahi izan dute.

2015 urtean bertan, Mercedes Vila doktoreari eskaintza bat egin genion, nanoGUNEren ekosistemara etor zekigun. Merche-ri gure spin-off baten zuzendaritza zientifikoa eskaini genion.
Garai hartan, ez genuen pentsatu gure laborategietan haragia haziko genuenik; baina bi urte geroago, 2017 urtean, Merche-k beste hiru ekintzailerekin batera abiatu nahi zuen proiektua –BioTech Foods– mahaigaineratu zidanean, laborategi berri bat abiatu genuen nanoGUNEn proiektuari heltzeko asmoarekin. Handik lau urtera, Brasilgo JBS erraldoiak 36 milioi inbertitu berri ditu BioTech Foods euskal enpresan, haragi landatuaren garapenaren arloan aitzindariak garela ikusita. 2017 urteko saiakera hura ere etorkizuneko industriari begira egindako apustua izan zen.

Gure misioa, nanoGUNEn, nanozientziaren eta nanoteknologiaren arloan puntako ikerketa egitea da, betiere Euskal Herriko lehiakortasun ekonomikoa areagotzeko xedez. Puntako ezagutzan oinarrituriko berrikuntza bultzatzen dihardugu, ezin aurreikus daitezkeen eraldaketetara egokitzeko gai izango den ekosistema indartzeko. Gure ekarpena poliedrikoa da, sinetsita baikaude oinarrizko ikerketa –aplikazio ezezagunak dituen ikerketa hori– ikerketa industrialarekin eta garapen esperimentalarekin uztartu behar dugula. Batetik, oinarrizko ikerketaren bidez ezagutzaren mugak zabaltzen ditugu. Bestetik, gure ikerketaren emaitzak ustia daitezkeela antzematen dugunean, hori egiteko modu eraginkorrenak bilatzen ditugu: batzuetan industriarekin kontratuak sinatzen ditugu, beste batzuetan gure patenteak lizentziatzen ditugu, enpresek ustia ditzaten. Izan ere, industriarekin elkarlanean dihardugunean, guk industriari laguntzen diogu gure ikerketaren bitartez, eta industriak guri bide berriak ireki diezazkiguke bere estrategia eta ezagutzaren bidez.

Kasu batzuetan, ordea, zaila izaten da gure ikerketaren emaitzak gaurko industriara eramatea, mundu mailan eta hemen bereziki. Hala, bada, enpresa berrien sorrerari ere ekiten diogu. Oro har, ikerketaren zenbait arlotan puntan egoteak ezinbesteko posizionameduaz hornitzen gaitu. Posizionamendu horrek nora eramango gaituen jakitea zaila izaten da, baina egoera pribilegiatu batean kokatzen gaitu, zer esanik ez, bidean azal dakizkigukeen aukerak une oro baliatu ahal izan ditzagun. Halaxe egin dugu gurean jaio diren enpresa guztiekin: Graphenea, Simune, Ctech-nano, Evolgene, Prospero, BioTech Foods eta Optec4life.

Oinarri teknologikoko enpresa berriek ongizatea ekarriko digute, zalantzarik gabe, zuzenean eta zeharka: zuzenean, lanpostuak sortuko direlako, jarduera ekonomikoaren bitartez zergen ekarpena handituko delako, eta gure zentroan diru sarrera berriak lortuko ditugulako ikerketa gehiago egin ahal izateko; eta zeharka, guk sorturiko enpresa horiek hemen, Donostian, Euskal Herrian, daudelarik, gure ingurua aberatsagoa izango delako eta, aldi berean, erakargarriagoa talentua munduko bazter guztietatik etor dakigun eta proiektu berriak abian jar daitezen. eta zeharka, guk sorturiko enpresa horiek hemen, Donostian, Euskal Herrian, daudelarik, gure ingurua aberatsagoa izango delako eta, aldi berean, erakargarriagoa talentua munduko bazter guztietatik etor dakigun eta proiektu berriak abian jar daitezen.

Edonola ere, hori ez da enpresa bakar baten kontua, ez eta hamar urteko kontua ere. Hori belaunaldi oso baten erronka da, gutxienez. Bada, bestalde, gurea bezalako ikerketa zentro batek gizarteari eta ihardun ekonimikoari egin diezaiokeen beste ekarpen mota bat: pertsonena. Guk hemen pertsonak ikerketan trebatzen ditugu, eta pertsona horietako batzuek industriara jauzi egiten dute. Goi mailako profesionalak dira, ezinbestekoak egungo industriak ezagutzaren mugan egoteari etekina atera diezaion.

Intel-ek ez daki etorkizuneko zirkuitu integratuak zeintzuk izango diren; baina horien bila ari da, orain arte bezala etorkizunean ere aitzindariak izan nahi dutelako. Guk ere hortxe segitu nahi dugu, puntaren puntan. Baina hor egoteko, hor segitzeko, trena galduko ez badugu, lurralde ezezagunetara eramango gaituen puntako ikerketa egiten jarraitu behar dugu, betiere industriarekin –gaurkoarekin eta, batez ere, etorkizunekoarekin– dugun konpromisoari eutsiz. Horixe da txikiaren erronka handia.

Azaroak 5, 2021

Ideia berrien garapenen oinarritutako estrategia hura; jarrera ekintzaile hura, gero eta lehiakorragoak izateko tresnetan bermatua; arriskuak hartzeko adore hura edota hutsegiteetatik ikasteko gaitasun hura… gene berritzaile horren adierazpideak baino ez ziren. Izan ere, Irizar Taldearen 132 urteko historian, gene hori izan da gure markaren, gure kulturaren eta gure nortasunaren bereizgarria.

Guretzat berrikuntza inbertitzea da, jakintzan, talentuan, produktu eta zerbitzu berrietan, teknologia iraunkor berrietan eta garapen berrietan inbertitzea. Baina, horrez gain, antolakundearen kulturan eta eguneroko kudeaketa-moduan aurrera egin ahal izateko giltzarria ere bada, berrikuntzaren bidez bizkorrago, malguago eta moldagarriago izango garelako, eta etorkizuneko erronkei aurre hartzeko gaitasun handiagoa izango dugulako. Hori da bidea gure bezeroentzat beti lehen aukera izan gaitezen aurrerantzean ere.

Garai berriek ere berritzera behartu gaituzte; izan ere, krisi sozio-sanitarioak eta ekonomikoak eraginda, ezinbestean epe motzeko erantzunak eman behar izan ditugu, oroz gain pertsonen eta haien familien segurtasuna eta osasuna babesteko, baita epe ertain eta luzera begirako erantzunak ere, negozioaren iraunkortasuna bermatzeko eta balioa sortzen jarraitzeko. Krisiak, ordea, aukera ere eman digu gure plan estrategikoak berregokitzeko eta berriro definitzeko, besteak beste, trantsizio energetikoaren eta mugikortasun iraunkor eta adimendun berriaren eskutik datozkigun erronka handiei arreta berezia jarrita. Eta, testuinguru horretan, berrikuntza giltzarria da berriro ere.

Trantsizio energetikoaren eta iraunkortasunaren erdigunean gauden aldetik, bi ideia hauek oso garbi izan beharko genituzke: pertsonak direla gure estrategiaren ardatza eta muina, eta guk bultzatu nahi dugun berrikuntza gauzatzeko ezinbestekoa dela lokarriak estutzea eta lankidetza-sare bat sortzea, hornitzaileen, tokiko zentro teknologikoen, erakundeen, unibertsitateen eta formakuntza-eskolen artean. Hala, sare horretako eragile guztion artean gai izango gara soluzio aitzindariak emateko, eta, horien bidez, gizartearen eta ekonomiaren garapenean inpaktu positiboa sortzeko.

Testuinguru horretan guztian, garrantzi berezia hartzen du Irizar Taldeak etorkizuneko sektore estrategikoetan berrikuntza eta teknologia propioaren sorkuntza bultzatzeko indarrean duen estrategiak. Taldearen eta estrategia horren helburuak bi dira funtsean: aberastasuna eta enplegua sortzen lagunduko duten soluzio aitzindariak eskaintzea, eta epe luzerako industria-ehuna sortzea. Alde horretatik, Next Generation funts ezagunak aukera ezin hobea dira Europako industria berriro ere teknologiaren abangoardian kokatzeko.

Autobusek eta autokarrek funtsezko betekizuna dute Europako Itun Berdearen iraunkortasun-helburuak betetzeko, bai eta 2050. urteari begira deskarbonizaziorantz eta klima-neutraltasunerantz trantsizio eraginkorra egiteko ere. Hain zuzen, horrekin lotura zuzena du Irizar Taldean hartu dugun erabaki estrategikoetako batek. Funtsezko eragile izan nahi dugu bide horretan: soluzioak eman nahi ditugu, gizartearen zerbitzura jarri nahi ditugu gure gaitasuna eta teknologia, eta aliantzak sortu nahi ditugu; ingurumena zaintzeko, ongizatea bermatzeko, pertsonen osasuna babesteko eta hirigune hobeak sortzeko gure konpromisoa berretsiko duten aliantzak.

Mugikortasun publiko kolektibo eraginkorrago baten alde egiten dugu apustu, isurketa kutsagarrien eta soinu-kutsaduraren mailak murrizteko, garraiobideen arteko loturak ahalbidetzeko eta modu horretara flotak hobeto kudeatzeko, erabiltzaileei emandako informazioa hobetzeko, eta garapen teknologiko berriak sartzeko. Hori guztia, helburu nagusi batekin: bidaiarien segurtasuna eta esperientzia hobetzea.

Azken batean, berrikuntza hori bizi dugu Irizarren, giroan dago, gure DNAn, bezeroekiko, gizartearekiko eta Irizar Taldea osatzen dugun pertsonekiko gure konpromisoan.

Urriak 28, 2021

RAEren hiztegiak honela definitzen du «berritu» terminoa: «Zerbait moldatzea edo aldatzea, berrikuntzak sartuz». Eta «berrikuntza», berriz, «berritzearen ekintza edo ondorioa» izateaz gain, «produktu bat sortzea edo aldatzea, eta produktu hori merkatuan sartzea» dela zehazten du. Hau da, badirudi «berrikuntza» oso loturik dagoela enpresa-munduarekin.

Lerro hauetan ikuspegi zabalagotik aztertuko dut «berrikuntza» eta ez produktuei loturik soilik; izan ere, hain ukigarriak ez diren zenbait alderdi «berritzea» ere funtsezkoa da, hala nola herritarren errespetua, parte-hartzea eta zaintza.

Caroline Criado Perez kazetari eta ekintzaileak «gizonezkoentzako neurri bakarreko ikuspegia» aipatzen du bere La mujer invisible liburuan (Financial Times-ek «2019ko negozio-liburu onenaren saria» eman zion lan horri). Ikuspegi horrek, historikoki, informazio eta interes falta erakutsi du emakumezkoei gertatzen zaigunarekiko eta gure kezkekiko, eta, horrek eragin du bai aurrerapen teknologikoak eta bai politika eta hirigintza arloko erabaki handiak (oharkabean, ondo pentsatuta) biztanleen erdia kanpoan utzita hartu izana. Eta gizartearen erdia alde batera utzita, «berrikuntzari» loturiko «aurrerapen» hori askoz onuragarriagoa gertatu da gizonezkoentzat bizitzaren alderdi guztietan; besteak beste, haien osasunaren zaintzan eta lan-aukeretan.

Zertarako «berritzen» da, diru gehiago irabazteko soilik, edo besterik gabe beharrizan sozialak sortzeko (bide batez esanda, zenbaitetan guztiz azalekoak)? Nire iritzian, «berrikuntzak» pertsonen bizimodua hobetzea izan behar du ardatz; berrikuntzak ezin du helburu izan bere horretan.

«Berrikuntza» herritar guztiengana iritsiko bada, emakumezkoek eta gizonezkoek berdintasunean gidatu beharko lukete. Berrikuntza horrek kontuan hartu beharko luke zaintza-lana lehenesteko beharra; hain zuzen, «ikuspegiaren arrakalak» (horrela izendatzen du Caroline Criado Perezek) betidanik alde batera utzi izan duena. «Berrikuntza» on batek detektatu eta ezabatu egin beharko lituzke kontratazioetan erabiltzen diren ustezko algoritmo «aseptiko» horietan sartu diren irizpide baztertzaileak; izan ere, usu lehenago kontratatzen dira gizon zuriak, kualifikazio bereko emakumeak baino. Emakumezkoek eta gizonezkoak gidatutako «berrikuntzak» aintzat hartuko luke, adibidez, emakumezkoen eskuak txikiagoak direla gizonezkoenak baino eta, beraz, gailuak eta bestelako tresna mota guztiak haietara egokitu behar direla. Orobat, genero-ikuspegia aintzat hartuko duen kalitatezko ikerkuntzaren alde egin beharko luke apustu, eta ez gizonezkoak «gizaki estandarraren» eredutzat hartzen dituen ikerkuntzaren alde.

Egiazko «berrikuntzak» kontuan izan beharko lituzke emakumezkoen, adinekoen eta egoera ahulean dauden kolektiboen beharrizanak eta iritziak. Nire egiten dut «berritu» terminoaren definizio hori: « Zerbait moldatzea edo aldatzea, berrikuntzak sartuz». Hala ere, «berritzea» ez da produktu berriak sortzea soilik; «berrikuntza» ez da horretara mugatzen. «Berrikuntzak» dira beste hauek ere: begirada askotarikoak eta ikuspegi desberdinak, horien bidez mundu orekatuagoa, bidezkoagoa, zintzoagoa… lortzeko, baita bazterketaren zama hainbeste sufritu ez duten pertsonentzat ere.

Urriak 21, 2021

Berrikuntza aldaera ugariko fenomenoa da, eta askotariko inguruneetan gerta daiteke. Aurkikuntza zientifikoen edo garapen teknologikoen eskutik gertatzen diren berrikuntzei buruz ariko gara hurrengo lerroetan.

Aurkikuntzatik berrikuntzara dagoen bidea, izatez, lerro zuzeneko kate bati dagokiona baino lausoagoa, gorabeheratsuagoa eta nahasiagoa da, baina, nolanahi dela ere, jakintza zientifikoan oinarritutako berrikuntzak egon daitezen, ezinbestekoa da, Pernandoren egia irudi balezake ere, ikerkuntza zientifikoa. Eta horretarako profesionalak behar dira. Arazoa da horrelakoak gutxi direla eta, seguru asko, ez dela gehiago izango etorkizun hurbilean; izan ere, bigarren hezkuntzako gure ikasleek gero eta hurbiltasun gutxiago agertzen dute zientziekiko eta matematikarekiko; hau da, STEM diziplinekiko.

Urruntze horri aurre egiteko eta gaizki izendatutako “bokazio zientifikoak” sortzeko orain arte martxan jarri diren ekimenak, funtsean, zenbait ikastetxek STEM arloak erakargarri egiteko ekinbideak izan dira, eta, emakumeen kasuan, erreferentziazko emakume zientzialarien ereduak erakusteko ekimenak. Ez dakit oso urrunera iritsiko ekimen horiek.

Beste herrialde batzuetako esperientziak erakusten du STEM ikasketei buruz ingurunean dagoen iritziaren eta balorazioaren arabera hartzen edo baztertzen dituztela ikasleek ikasketa horiek. Alde horretatik, lehen hezkuntzako eta derrigorrezko bigarren hezkuntzako azken ikasturteetako ikasleen familiei STEM lanbide horien berri emateko helburua izan duten ekimenak arrakastatsuak izan dira, eta ez da harritzekoa. Zientzia eta teknologia arloko karreretan arrakasta dutenei egozten zaien distira- eta bikaintasun-aire hori ezabatzen lagundu dute ekimen horiek, eta, era horretara, norberaren gaitasunari buruzko oso pertzepzio bestelakoak dituzten ikasleak hurbildu dira ikasketa horietara.

Hedapen sozialeko ekintzen bidez kultura zientifikoa sustatzea ere lagungarri bide da familiek eta ikasleek karrera horiekiko interes handiagoa izateko. Ekintza horiek eremu publikoan jartzen dituzte zientzia eta teknologia. Dibulgazio-ekintzen bidez hedapen sozialeko medioetan eduki zientifiko-teknologikoak transmititzea lagungarri da herritartasun arduratsurako irizpide-iturri bat izateko, baina horrez gain, ekintza horiek kultura zientifikoa eta teknologikoa sustatzen dute, haien garrantzi soziala nabarmentzen dute, eta, garrantzitsuena, eremu publikoan jartzean eta, beraz, ikusgaitasuna ematean, eduki horiei ospea ematen diete, eta, horri esker, gizarteak gehiago baloratzen ditu.

Lan hori agit-prop dela esatea gustatzen zait, eta zaila da zenbaterainoko garrantzia duen zehaztea. Lanbide horiek ekonomian, gizartean eta politikan duten garrantzia aintzat hartuta, merezi duten lekua emateko balio du lan horrek. Izan ere, erakusten dena, ikusi egiten da; ikusten dena, baloratu egiten da; baloratzen dena, estimatzera iritsi daiteke; estimatzen dena ikasleen interes profesionaleko bihur daiteke, edo gurasoek beren seme-alabentzat nahi duten etorkizun profesionala izan daiteke. Epe luzerako zeregina da hori. Fruituak ez dira bi edo hiru urtean iristen. Baina, Espainiako estatuan gutxienez, egiaztatu dugu herritarrek zientziarekiko adierazitako interesak gora egin duela erakundeen aldetik munta horretako ekimenak hartu direnetik.

Azkenik, baina ez horregatik garrantzi gutxiagorekin, STEM karrerak erakargarriak izan daitezen eta gazteak horiek ikastera anima daitezen, oso lagungarri izango da lanbideok soldata aldetik ere merezi duten aitortza izatea; hau da, enpresentzat, administrazioarentzat eta herrialdearentzat duten garrantziaren pareko ordaina izatea.

Irailak 30, 2020

Garai arraroak bizi ditugu. Pandemiak gure bizitzako ia eremu guztiak aldatu ditu, eta merkataritza-prozesuak ez dira salbuespena. B2B sektorea berealdiko aldaketa garaian bizitzen ari da, eta lehendik ere ingurune digitalean sartzeko ahalegin betean zegoen arren, COVID-19ak azkartu egin du prozesua. Horren adierazle, sektoreko elkarteek pandemiaren lehen hilabeteetan egindako txostenetan argi adierazi zuten zein zen konpainien kezka nagusia: nola bideratu lan komertziala distantzia sozialeko testuinguru batean?

Ezin zutenez bidaiatu, bilerarik egin, azoka eta ekitaldi komertzial handietara joan edo bezeroak bisitatu, merkataritza-departamentuek alde batera utzi behar izan zuten aurrez aurrekoa, eta ohiko bideen aldean bezeroak berenganatzeko beste kanal batzuk bilatu behar izan zituzten. Pandemiaren hasierako hilabete haietatik, izugarri ugaritu dira proiektu komertzial digitalei buruzko informazio-eskaerak, eta, era berean, bezeroak erakartzeko estrategia digitalak “premiaz martxan jartzeko” eskabideak ere gero eta gehiago jasotzen ditugu. Estrategia digital horien bidez erbiak altxatzen jarraitu nahi dute konpainiek.

Oro har, industria-sektorea ez da estrategia komertzialetan aldaketak egin zalea, baina hala ere, gero eta konpainia gehiago jabetzen dira bezeroak berenganatzeko ekimen komertzial digital batek eragin positiboa izan dezakeela emaitzen kontuan. Horren erakusle, adibide hau: nahiz eta azken urtean zailtasun handiak izan, Weroiren bezero gehienek eutsi egin diote beren negozio-zifrari edo handitu egin dute zifra hori, kanal digitalari esker.

Jakina, enpresa batzuei irudituko zaie pandemian ezarritako neurriekin (telelana, online bilerak, bezeroentzako email bidezko marketina…), gauzatu dutela beren eraldaketa digitala, eta beste pare bat urtetan ez dutela aldaketa gehiagorik egin beharko. Arrisku hori hor dago. Ez dezagun, ordea, halako hutsegiterik egin. Aldaera digitala sartzea lehiarako abantaila dela pentsa liteke oraintxe bertan, baina oso epe laburrean hil ala biziko auzia izango da, enpresen biziraupenerako. Baita departamentu komertzialetarako ere.

Gure azterlanetan nabarmenak dira jada bilakaera horren seinaleak. Gartner aholkularitza-enpresak The Future of Sales txostenean iragarri duenez, 2025erako, B2B merkataritza-interakzioen %80a kanal digitalaren bidez egingo da. McKinseyren azterlan baten arabera, pandemia hasi zenetik, prozesu komertzial gehien-gehienak aurrez aurre beharrean urrunera egiten dira, kanal digitalaren bidez, eta profesionalen erdiek baino gehiagok onartu dute emaitza berberak edo hobeak lortu dituztela, pandemiaren aurrekoekin alderatuta.

Eredu komertzial tradizionalei agur esateko garaia da. Edo, gutxienez, ulertu beharko dugu hemendik aurrera eredu horiekin batera ikuspegi digitala duten beste estrategia batzuk ere bideratu behar ditugula. Denbora daramagu ikusten estrategia komertzial ez konbentzionalen aldeko apustua gero eta argiagoa zela, eta pandemiak bultzada erabakigarria ekarri du. Konpainiek egiaztatu dute zein eraginkorra eta errentagarria den kanal digitala, eta seguru asko jada ez diote bide horri uko egingo. Hori dela eta, garbi samar dago krisialditik suspertzeko eta enpresei luzaroan indarrean eusteko, ezinbestekoa izango dela konpainien prozesu komertzialak digitalizatzea.

 —

Weroi konpainiak 12 urtetik gorako esperientzia du marketin komertzial-digitaleko proiektuak garatzen, eta industria arloko eta B2B sektoreko enpresei Internet garatzen laguntzea die, tresna horien bidez negozio-aukera berriak erakarri eta berenganatu ditzaten. Kanal horren abiadura eta sare-izaera baliatzen dugu, inbertsio digitalek benetako eragina izan dezaten emaitzen kontuan. Horretarako, elkarlan estuan jarduten dugu gure bezeroekin, hasieratik bukaerara: proiektuaren zehaztapen estrategiko eta operatiboa egiten, marketin- eta salmenta-departamentuen artean beharrezkoak diren informazio-fluxuak diseinatzen, eta azken urratsean, proiektuaren ROIa neurtzen.