Berrikuntzaren Euskal Agentzia, Innobasquek gaur aurkeztu ditu Euskadiko Teknologia Parkean Euskadin berrikuntza artikulatzen duen eginkizuna eta esperientzia, Poloniatik etorritako ordezkaritza instituzional, zientifiko eta enpresarial baten aurrean. Ordezkaritza hori Silesia Behereko eskualdeko eta اukasiewicz ikerketa-sareko ordezkariek osatzen dute. Topaketan, 900 erakunde bazkide baino gehiago biltzen dituen elkarte publiko-pribatu gisa duen funtzioa aurkeztu du Agentziak, bai eta Euskadin berrikuntza artikulatzen duen eginkizuna eta eragileen arteko lankidetzan eta berrikuntzaren jarraipenean duen esperientzia ere.
Bilera irailaren 29tik urriaren 2ra bitartean Euskadira egiten ari den misio baten esparruan egin da. Misio hori Silesia Behereko Voivodatuaren Mariskalaren Bulegoak sustatu du, ITECH Teknologia Berritzaileen Institutuaren bidez اukasiewicz ikerketa-sarearekin lankidetzan eta Basque Trade & Investmentek koordinatuta. Bisitaren helburua berrikuntza, ikerketa eta transferentzia teknologikoko politikan jardunbide egokiak ezagutzea da, euskal ekosistemako ordezkarien eta Behe Silesiako berrikuntza sistemako eragileen arteko harremanak ezartzeaz gain.
Poloniako ordezkaritzak eskualdeko eta estatuko administrazioari, unibertsitateei, ikerketa-zentroei, parke zientifikoei, inkubagailuei, garapen ekonomikorako erakundeei eta enpresa-erakundeei lotutako profilak biltzen ditu.
Innobasquerekin izandako topaketa agenda zabalago batean txertatu da berrikuntzaren euskal ekosistemako eragile eta ekimen nagusietako batzuekin. Bere egonaldian, ordezkaritzak Eusko Jaurlaritzaren berrikuntza politika ezagutu du SPRIren bidez, eta Basque Digital Innovation Hub eta BIND tresnetara hurbildu da, GAIArekin topaketa bat egiteaz gain. Euskadiko Parke Teknologikoen Sarera, BIC Bizkaira eta Tecnaliara bisitak ere egin dira programan.
Oro har, agendak aukera eman dio Poloniako misioari euskal berrikuntza-sistemaren maila desberdinetara hurbiltzeko: laguntza-politika publikoak, azpiegitura eta zerbitzu teknologikoak, ekintzailetza eta berrikuntza irekia, enpresa-lankidetza, ezagutzaren transferentzia eta ikerketa aplikatua.
