Innobasque Berrikuntzaren Euskal Agentziak GI* Talent foroan parte hartu du gaur. Noticias de Gipuzkoa egunkariak sustatu du topaketa, Gipuzkoako Foru Aldundiaren laguntzarekin, eta urtero biltzen ditu lurraldeko ekosistema ekonomiko, hezitzaile eta sozialeko eragileak, talentua erakartzeko, garatzeko eta atxikitzeko erronkei buruz hausnartzeko. Zortzigarren edizioan, Donostiako San Telmo Museoan, enpresako belaunaldien arteko bizikidetzan oinarritu da foroa.
“Ezagutzaren eta gaitasunen batuketarako ekimenak” mahai-inguruan, Goizalde Atxutegik, Berrikuntzaren Euskal Agentziako Enpresa Berrikuntzako Proiektuen koordinatzaileak, Innobasquek lekua partekatu du Jokin Aranzabal Antonio Aranzabal Fundazioko patroi idazkariarekin eta Nerea Otxoa Guridi IDEKOko Pertsonen Kudeaketa eta Garapeneko arduradunarekin, Oihana Prado Noticias de Gipuzkoako kazetariak moderatutako elkarrizketa batean. Elkarrizketa horretan, belaunaldien arteko lankidetza nola sustatu eta erakundeetan ezagutza kritikoa nola zaindu izan du ardatz.
Atxutegik, bere hitzaldian, enpresetan ezagutzaren transferentzia eta belaunaldien arteko erreleboa aldez aurretik planifikatzeko beharra nabarmendu du. “Ezagutza kritikoa galtzeko arriskua benetakoa da. Informazio teknikoaz ez ezik, erakundeen jarraipenerako funtsezkoak diren jakintza tazitoez ere ari gara – nola hartzen diren erabakiak, nola kudeatzen diren ustekabeko egoerak –, adierazi du.
Innobasquek foroan duen ordezkariak azpimarratu duenez, ezagutzaren transferentzia “ez da egun batetik bestera gertatzen, metodoa, konpromisoa eta denbora behar dira”. Gainera, erretiroa hartzen duten pertsonek metatutako esperientzia aitortzearen eta balioestearen garrantzia gaineratu zuen, ezagutza hori belaunaldi gazteenek ematen dituzten gaitasun berriekin integratuz.
Arlo horretan, Innobasque Berrikuntzaren Euskal Agentziak hainbat ekimen bultzatzen ditu erakundeetan ezagutzaren transmisioa eta adinaren kudeaketa errazteko, besteak beste, Lanbideren Lan Mentoring programa, enpresa txiki eta ertainei belaunaldien arteko erreleboa planifikatzen laguntzeko. Doako zerbitzu horrek saio presentzialak eta aholkularitza espezializatua uztartzen ditu, eta lurraldeko enpresetan funtsezko ezagutzaren jarraitutasuna bermatzen laguntzen du.
Enpresan erreleboa kudeatzeko erabilgarri dauden programekin lotuta, Atxutegik gogorarazi du ezagutzaren transferentziarik onena denborarekin planifikatzen dena dela, nahiz eta “beti dagoen jarduteko marjina jarduteko konpromisoa eta borondatea dagoenean”.
