Eusko Jaurlaritzako Gizarte Berrikuntza eta Agenda 2030 Zuzendaritzak, Alboan nazioarteko lankidetzarako GKEarekin lankidetzan, Lehiakortasun Jasangarriari buruzko Mintegiaren jardunaldi irekia egingo du abenduaren 10ean, Bilboko BBK Kuna aretoan, Euskadiko Enpresetatik Mundura 2025 programaren barruan.
“Euskal enpresek GJHei egiten dieten ekarpena, euskal 2030 Agendan parte hartuz” izenburupean, jardunaldiak Euskadiko Enpresetatik Mundura proiektua testuinguruan kokatzeko aukera eskainiko du. Euskadiko 2030 Agendarako hausnarketa kritikoa sustatzea eta aurrera egiteko proposamen zehatzak sortzea helburu duen ekimena da Euskadiko Enpresetatik Mundura, eta lehiakortasun jasangarriak euskal 2030 Agendan duen zereginaren berri emango du. Gainera, jasangarritasuna kudeatzeko tresna eta soluzio zehatzak aurkeztuko ditu, hala nola inGUru+, Euskalit eta Eraldatzen, beren estrategia eta negozio eredua Garapen Jasangarriko Helburuekin (GJH) alienatzea lortu duten euskal enpresen kasu errealak, eta joera estrategikoen azterketa, hala nola balio kateko arriskuen kudeaketa, pizgarri fiskalak eta inbertsio jasangarriaren etorkizuna.
Jardunaldiak Lehiakortasun Jasangarriari buruzko Mintegiaren lana jorratuko du. Mintegi horrek, talde eragile batekin batera, euskal enpresa sarearen erronka eta aukera nagusiak landu ditu, GJHei egiten dieten ekarpena bizkortzeko.
Zehazki, ekimenaren aurrerapenak partekatuko dira euskal enpresek 2030 Agenda ezartzeko lehentasunezko erronkak identifikatzean eta prozesuaren oinarri kontzeptualak definitzean; jasangarritasunaren arloko enpresa praktika on bat zertan datzan hausnartzean, kontuan hartuta txertatu beharreko alderdiak eta aliantzen funtsezko garrantzia; eta GJHak enpresetan estrategikoki integratzearen eragin eraldatzailea zabaltzeko aukera ematen duten oraingo zein etorkizuneko proiektuak eta lankidetzak hautematean.
Ekitaldia Nazio Batuen Garapen Jasangarriko Helburuen enpresa integrazioa sustatzeko eta jasangarritasuna lehiakortasunaren esparruan eraldatzeko interesa duten enpresetako, jasangarritasun taldeetako, goi zuzendaritzako eta gizarte erakundeetako ESG (Ingurumen, Gizarte eta Gobernantza) irizpideen arduradunei zuzenduta dago.
