Eusko Jaurlaritzak uztailaren 3ra arte du zabalik BIKAINTEK 2026 deialdia eskatzeko epea. Laguntza-programa horrek 4,4 milioi euro inguru ditu I+G proiektuak bultzatzeko, ikertzaile doktoreak kontratatuz eta doktoretza industrialak eginez.
Industria, Trantsizio Energetikoa eta Jasangarritasuna Sailak sustatutako ekimenak urtean 42.000 eurorainoko dirulaguntzak aurreikusten ditu doktoreen lerroan egindako kontratazio bakoitzeko, eta 28.000 eurorainokoak doktoretza tesi industrialen lerroan.
Programa Euskadin produkzio-zentroa duten enpresetan eta Zientzia, Teknologia eta Berrikuntzaren Euskal Sareko eragile jakin batzuetan I+G proiektuak sustatzera bideratuta dago, kualifikazio handiko ikertzaileak sartuz. Horrekin, euskal ekosistema industrialaren gaitasun zientifikoa eta teknologikoa indartu nahi da, eta balio erantsi handiagoko proiektuen garapena bultzatu.
Deialdia Europako industria-estrategiaren barruan kokatzen da, eta estrategia horrek industria-politikaren zeregina indartu du azken urteotan, lehiakortasunaren, jasangarritasunaren eta autonomia estrategikoaren ardatz gisa. Testuinguru horretan, Euskadi 2030 Industria Planak lehentasunen artean kokatzen du enpresen maila teknologikoa hobetzea eta talentu kualifikatua erakartzea eta garatzea, ekoizpen eredua eraldatzeko funtsezko elementu gisa.
Laguntzek bi kontratazio modalitate dituzte: industria ikerketako proiektuetarako doktoretza titulua duten pertsonak, eta halako proiektuekin lotutako doktoretza tesi bat hasten dutenak. Doktoreen kasuan, kontratuak 2027ko abenduaren 31ra arte luzatu beharko dira gutxienez, eta doktoretza industrialen kasuan, 2029ko abenduaren 31ra arte, urteko 35.000 eta 25.000 euroko gutxieneko ordainsari gordinekin, hurrenez hurren, Gizarte Segurantzaren kostuaz gain.
Bikaintek programa ZTBESko enpresetan eta eragileetan prestakuntza handiko ikertzaileak sartzen laguntzeko tresna bat da, digitalizazioaren, trantsizio energetikoaren, jasangarritasunaren eta nazioarteko lehiakortasunaren erronkekin bat datozen I+G proiektuak bultzatuz. Era berean, ikerketaren eta berrikuntzaren arloko Europako jarraibideei erantzuten die, ikertzaileek aurrerapen zientifiko eta teknologikoaren motor gisa duten zeregina azpimarratzen baitute.
Laguntzek kontratazio-kostuak estaltzen dituzte, soldata eta gizarte-kotizazioak barne, zeharkako kostuen ehuneko batez gain. Doktoretza industrialen kasuan, beste ikerketa zentro batzuetako egonaldiei lotutako gastuak ere aurreikusten dira, bai estatukoak, bai nazioartekoak.
Deialdiaren esteka garrantzitsuak
