Valentzian egin den Industria Konektatua 4.0 V. Kongresu Nazionalaren barruan, Industria Konektatua 4.0 IV. Sari Nazionalak eman dira. Aurten, ETE kategorian, Biolanek irabazi du, Innobasque Berrikuntzaren Euskal Agentziako enpresa bazkideak; Repsolek, aldiz, enpresa handien kategorian lortu du saria. Reyes Maroto Industria, Merkataritza eta Turismoko ministroak eman dio saria Asier Albizuri, Biolaneko zuzendari nagusiari.
Sari horien helburua da industria-ehunaren kontzientzia areagotzea beharrezkoa den eraldaketa digitalari buruz. Aldi berean, 4.0 Industriaren arloan arrakasta izan duten Espainiako proiektuak identifikatzeko, hedatzeko eta aintzatesteko tresna da. Horrek guztiak gazteen artean bokazio industrialak eta digitalak areagotzen laguntzen du.
