Eusko Jaurlaritzako Industria, Trantsizio Energetiko eta Jasangarritasun Sailak BIKAINTEK programaren 2025eko deialdia ireki du. Ekimen horren helburua da euskal enpresen I+G bultzatzea, doktoretzako ikertzaileak kontratatuz eta doktoretza industrialak eginez.
Guztira 5,7 milioi euroko aurrekontuarekin, neurri honek euskal produkzio-sarearen lehiakortasuna indartu nahi du, Zientzia, Teknologia eta Berrikuntzaren Euskal Sareko (ZTBES) enpresetan eta eragileetan kualifikazio handiko talentua sartuz.
Ekimenak bi laguntza-ildo ditu: batetik, doktore titulua duten ikertzaileak kontratatzea, 24 hilabeteko kontratuekin eta urteko 35.000 euroko gutxieneko ordainsariarekin, eta, bestetik, doktoretza industrialak egitea, lau urteko kontratuekin, euskal unibertsitate batean matrikulatuta eta urtean gutxienez 22.000 euroko ordainsariarekin.
Laguntzek diruz lagundu daitezkeen kostuen % 50 eta % 70 artean estaliko dute, eta gehienez 60.000 euro doktoreak kontratatzeko eta 40.000 euro doktoretza industrialetarako. Eskaerak 2025eko martxoaren 13tik apirilaren 14ra bitartean aurkezten ahalko dira. Interesa duten enpresek esteka honetan edo Eusko Jaurlaritzak gaitutako harremanaren bidez lor dezakete informazio gehiago, [email protected] helbide elektronikoan edo 945 019 985 telefono zenbakian.
