Innobasquek “Berrituz hazi: fiskalitatea, finantzaketa eta laguntza tresnak” solasaldia hartu du gaur, ekainak 22, fiskalitatea, laguntza publikoak, inbertsioa eta lankidetza publiko-pribatua aztertzeko topaketa, berrikuntzan oinarritutako enpresa hazkundea bultzatzeko palanka gisa.
Jardunaldian hamabost bat enpresa txiki eta ertainen ordezkariak izan dira, eta Eusko Jaurlaritzako Ogasuneko sailburuorde Iñaki Alonsok, Finantzen Euskal Institutuko zuzendari nagusi Amaia del Villarrek, Berrikuntzaren Euskal Agentziako zuzendari nagusi Leire Bilbaok eta Innobasqueko Berrikuntza Sustatzeko zuzendari Gotzon Bernaolak parte hartu dute.
Parte hartu duten enpresei dagokienez, Aernnova Engineering Division, Biotechnology Institute, Burdinola, Dorlet, Gobesa, Grupo OSGA, Illargui Corporación Alimentaria, Krean, Lantek Sheet Metal Solutions, LKS, Muriel Wines, Ondoan, Sedical, Erhardt Serikat, Ulma Lifting Solutions eta Vicinay Marine izan dira.
Leire Bilbao Innobasqueko zuzendari nagusiak, Iñaki Alonso Eusko Jaurlaritzako Ogasun sailburuordeak eta Amaia del Villar Finantzen Euskal Institutuko zuzendari nagusiak ongietorria eman ondoren, enpresen hazkundeari laguntzeko palanka nagusiak jorratu dituzte, hala nola fiskalitatea, laguntza publikoak, inbertsioa eta lankidetza publiko-pribatua.
Elkarrizketarako eta entzuteko espazioa
Topaketa norabide bikoa izan da, enpresen hazkundeari laguntzeko tresnak ezagutarazteko eta entzute aktiborako gune bat ahalbidetzeko pentsatua. Ildo horretan, parte hartu duten erakundeek zuzenean jaso ahal izan dituzte enpresek planteatutako ekarpenak, beharrak eta erronkak, esperientziak kontrastatzera eta laguntza tresnak enpresa ehunaren errealitatera hobeto egokitzera bideratutako truke batean. Horretarako, saioan parte hartzeko dinamika bat sartu da bertaratutako enpresekin.
