Innobasquek, esperimentazio arlo berri bat jarri du martxan gaur, irailak 24, berariaz entitate bazkideei zuzendurik. Agentziaren 2026-2030 Plan Estrategikoan txertaturik dago ekimena, eta bat dator Euskadi 2030 Zientzia, Teknologia eta Berrikuntza Planean (200 ZTBP) zehaztutako lehentasunekin.
Innobasquek, entitate bazkideekin batera, metodologiak, prozesuak, antolaketa-ereduak eta lankidetzarako dinamika berriak esperimentatuko ditu, eta berritzeko beste modu batzuk probatu. Hala, prozesu horrek Zientzia, Teknologia eta Berrikuntzako Euskal Sistemaren eboluzioan lagundu dezake.
Proiektuek metodologia berritzaileak landuko dituzte Euskadirentzat, frogatutako edo ebidentziak babestutako potentzialarekin. Bakoitza talde txikitan garatuko da, sei eta hamar erakunde bazkide artean, eta proiektuaren esparruan adituak diren erakundeen laguntza izango du.
Proiektu bakoitzak, gainera, elkarren osagarri diren bi planotan lan egingo du. Alde batetik, metodologia dago; hau da, esperimentatzen eta balioztatzen den ikuspegi berria, eta hori dokumentatuta geratuko da beste esparru batzuetan errepikatzeko edo eskalatzeko. Bestetik, aplikatuko den proiektua dago. Horren bidez jarriko da proban metodologia, benetako partaideekin, esparru jakin batean eta partaide diren entitateentzat balio zuzena sortzeko helburuarekin.
Parte hartzeko interesa duten entitate bazkideek Innobasque, Berrikuntzaren Euskal Agentziaren webgunean eman dezakete izena urriaren 31ra arte. Proiektuak 2026ko azarotik 2027ko urtarrilera bitartean jarriko dira martxan.
Sei proiektu berritzeko beste modu batzuk esperimentatzeko
2026an, sei esperimentazio-proiektu izango dira eremu horretan, esparru hauei loturik:
“Berritu Sarean” ekimenak ikasketarako komunitate bat sortuko du enpresa handien artean, berrikuntzaren kudeaketari buruzko jakintzak eta praktikak konpartitzeko, tokian tokiko eta nazioarteko erreferentziazko eragileekin. “Esploratu AA Fisikoa” proiektuak teknologia horri loturiko aukera eta mehatxuei aurre hartzen lagunduko die industria arloko enpresei, erabaki estrategikoak informazio gehiagorekin hartu ahal izan ditzaten. “Diseinatu Berrikuntzako Erronka Publikoak” administrazio eta elkarte publikoekin lan egingo du, benetako beharrizanak eraldatu eta ondo formulatutako berrikuntza-erronka bihurtzeko.
“Aurre hartu Disruptiboari” ekimenak Moonshot Thinking metodologia aplikatuko du, aukerako eremu berriak identifikatzeko; “Erronka jo diezaiogun Kuantikari” proiektua benchmarking eredu kolaboratibo batean oinarriturik dago, eta horren xedea da industria arloko erronken aurrean konputazio kuantikoko soluzioak kontrastatzea. “Eskala ezazu zure negozioa” proiektuak, azkenik, oinarri teknologikoko ETEen hazkundea du helburu.
Proiektuak talde txikitan garatuko dira, eta hainbat antolakunde aditu izango dira bidelagun, hala nola BAIC, Basque Quantum, BRTA, ESADE, Excelia Best Practices, SPRI, TECH friendly, Tecnalia eta Telefónica.
Webinar-ak proiektuak ezagutzeko
Berrikuntzaren Euskal Agentziak urriaren 7an eta 8an bi informazio-saio antolatuko ditu webinar formatuan, sei esperimentazio-proiektuak ezagutarazteko.
Proiektuak bi saioen artean banatuko dira, eta aurkezpen bakoitzerako ordutegi berezituak izango dira. Horrenbestez, entitate bazkideek aukera izango dute beren interesekoetara konektatzeko.
