2025ean, Europako 310 patente eskaera aurkeztu ziren Euskaditik, eta 2024an, berriz, 326 (-%4,9), aurreko urtean % 24,4ko ezohiko hazkundea izan ondoren. Patenteen Europako Bulegoak (EPO) atzo aurkeztutako Patent Index 2025 txostenaren arabera, Euskadik maila historikoki altuak ditu, azken hamarkadako zientzia eta berrikuntza plangintzan jasotako helburuen gainetik.
Euskadik Estatu osoan duen pisu erlatiboa Espainiako eskaeren % 13,7koa da orain EPOaren aurrean, eta 2024an, berriz, % 14,9koa izan zen, Espainia osoa berriro hazten ari den testuinguruan (+%2,9). Estatuko EPO eskatzaileen top 10 zerrendan ageri diren lau euskal erakundeek – Autotech (Gestamp I+G), Multiverse Computing, Tecnalia eta EHU – beren presentziari eutsi diote 2025ean, eta nabarmen handitu dute baterako bolumena. 2025ean, erakunde horiek 100 eskaera batu zituzten, 2024an 78 izan ziren bitartean, eta Euskadiko eskaera guztien % 32 bildu zituzten, eta horrek berretsi egiten du berrikuntzaren euskal sistemaren barruan duten zeregin traktorea.
Arlo teknologiko estrategikoak
Patent Index 2025 berriak (Technology Dashboard 2025) baieztatu du teknologia digitalek patenteen eskariaren hazkundeari tira egiten jarraitzen dutela Europan, konputazioaren arloan % 6,1eko igoerarekin, adimen artifizialak (+%9,5) eta teknologia kuantikoek (+%37,9) bultzatuta.
Bilakaera hori bat dator Euskadiren espezializazio gero eta handiagoarekin, non komunikazio digitalari eta konputazio teknologiei lotutako eskaerak nabarmentzen diren, eta indartzen du EAEk adimen artifizialean eta teknologia kuantikoetan aktiboak babestearen alde egiten duen apustua norabide egokian doala dioen mezua.
