Euskal Estatistika Erakundeak (Eustat) Ikerketa eta Garapen Esperimentaleko 2025eko datuen aurrerapena[1] argitaratu du. Behin behineko informazio horren arabera, I+Gko barne gastua %6,1 hazi zen iaz, eta jarduera horietan aritzen den langileen ehunekoa ere, dedikazio osoko baliokidetzan (DOB) neurtuta, %3 handitu zen. Sektore publikoaren eta enpresa sektorearen dinamismoak bultzatu zuen, batez ere, hazkunde hori.
Aurrerapen hori aintzat hartuta, Euskadin I+G arloan eginiko guztizko inbertsioa 2.243 milioi eurokoa litzateke 2025ean, segida historikoan inoizko handiena.
Emaitza horiek eta Eustatek hazkunde ekonomikoari buruz eginiko azken estimazioak kontuan izanda, I+G arloan eginiko ahalegina BPGd-aren %2,17koa litzateke 2025ean. Aurreko urtean, 2024an, %2,15 izan zen. (EINek datu hobeak ematen ditu Euskadirako). Beraz, Euskadi EB-27ko batez bestekotik oso gertu legoke (%2,24 2024an), eta Espainia osoko batez bestekoa (%1,5) baino nabarmen gorago, Eurostateko datuen arabera.
Datuak ikerkuntza-jarduera gauzatu duten sektoreen arabera xehakatuta, enpresa-esparruak %6,1 handitu zuen I+Gko barne gastua, eta langileen ehunekoa, berriz, %3. Enpresen sektore horretan sartzen dira zentro teknologikoak, ikerkuntza kooperatiboko zentroak eta irabazi asmorik gabeko entitate pribatuak. Administrazio publikoan, gastua %9,1 hazi zen, eta I+G arloan jardun zuen langileen ehunekoa, %6,7. Azkenik, goi-mailako irakaskuntzan, gastua %4,8 handitu zen, eta I+G arloan jardun zuen langileen ehunekoa, % 0,1.
Innobasquek eginiko aurreikuspenen[2] arabera, joera horrek jarraipena izango du 2026an. I+Gko inbertsioa %5,8 handituko da, ziurgabetasun geopolitikoak eta Europako programen arteko trantsizioak baldintzatutako testuinguru batean. Hala, enpresen I+Gko inbertsioa %5,2 haziko da, ziurgabetasun globalak eta euskal industriako sektore estrategiko batzuen moteltzeak eraginda. Bestalde, administrazio publikoen finantzaketa %8,5 milioi euro haziko da, Eusko Jaurlaritzaren laguntzak izan duen hazkundeari eta Europako Next Generation funtsen exekuzioari esker. Aldiz, nazioarteko finantzaketa %4,9 murriztuko da, arrazoi nagusi hauek direla medio: Europako Esparru Programa berriranzko (FP10) trantsizioa; I+G arlorako funtsak eskuratzeko lehia gero eta handiagoa, eta Euskadiko gaitasun zientifiko-teknologikoak eta Europako deialdiak ez hain lerrokatuta egotea.
Innobasqueren aurreikuspenak eta Eusko Jaurlaritzak hazkunde ekonomikoari buruz eginiko azken estimazioak betetzen badira, I+Gko inbertsioa BPGd-ren %2,22ra iritsiko da 2026an; horrenbestez, Europar Batasuneko (EB-27) batez bestekoaren parera iritsiko da Euskadi.
[1]Eustatek jasotako I+Gko gastu osoaren % 87,6 osatzen duten erakundeen datuen behin-behineko emaitzak. Behin betiko datuak 2026ko azaroan argitaratuko dira.
[2]Euskadin I+G arloan 2026an egingo den inbertsioaren estimazioa, eredu matematiko batean oinarritua. Ikerkuntzarako eta Teknologiarako Euskal Aliantzaren (BRTA) eta euskal I+G arloko enpresa-finantzaketa osoaren %43 batzen duten 19 konpainia trakziogileren datuetan oinarritzen da eredu hori.
