Europako Batzordeak Europako Esparru Ekonomikoko 23 herrialdetako 77 proiektu hautatu ditu, eta Berrikuntza Funtsetik 3.400 milioi euro jasoko dituzte, emisio txikiko teknologiak bultzatzeko. Batzordearen kalkuluen arabera, berotegi-efektuko gasen 290 milioi tona inguru ekidin ditzakete ekimenek lehen hamar urteetan.
Hautatutako proiektuen artean, euskal partaidetza duten bi daude: H2SITE UP TEMPO, H2SITE enpresa teknologikoak koordinatua, eta LATEM, Lithium Iberiak koordinatua eta Sidenorren partaidetza industrialarekin. Biak esparru estrategikoetan kokatzen dira, deskarbonizazioan aurrera egiteko eta Europako industria eta energia autonomia indartzeko.
H2SITE UP TEMPO proiektuak purutasun handiko hidrogenoa ekoizteko eta bereizteko goi teknologiako paladiozko mintzen hedapen industriala du ardatz. Teknologia horrek hidrogenoarekin eta haren aplikazio industrialarekin lotutako soluzioen garapena erraztu nahi du.
Bestalde, LATEMen helburua da litioaren eta bateriak fabrikatzeko materialen Europako balio kate bat garatzea. Ekimena elektrifikazioan eta energia biltegiratzean aurrera egiteko beharrezkoak diren lehengaiak eta industria gaitasunak izateko erronkarekin lotzen da.
Berrikuntza Funtsa emisio-eskubideen merkataritzako Europako araubidearen diru-sarrerekin finantzatzen da, eta emisio txikiko teknologia berritzaileak garatzen eta ezartzen laguntzen du. Proiektuen aukeraketak, beste irizpide batzuen artean, emisioak murrizteko duten potentziala, berrikuntza maila, heldutasuna eta erreplikatzeko duten gaitasuna hartzen ditu kontuan.
Laguntza horiek teknologia garbiei eta lehengai kritikoei laguntzeko Europako beste tresna batzuekin osatzen dira, hala nola Europarako Teknologia Estrategikoen Plataformarekin (STEP) eta Europako Inbertsio Bankuaren (EIB) laguntza tekniko eta finantzarioarekin. Klimaren, Azpiegituren eta Ingurumenaren Europako Agentzia Exekutiboak (CINEA) laguntzen kudeaketan parte hartzen du.
Elektrifikazioak eta energia biltegiratzeak ere laguntza jasotzen dute I+G+b-ko Europako beste programa batzuen bidez. Horren adibide da ELEVATE, Europar Batasunak finantzatutako proiektua, non CIDETEC Energy Storage euskal zentro teknologikoak parte hartzen duen, abiazio elektrikorako egoera solidoko baterien garapenean zentratuta.
Informazio gehiago:
