Innobasque Berrikuntzaren Euskal Agentziak sustatutako “Marketineko ikerketari aplikatutako sentsorika eta errealitate birtuala” web-mintegiak hileroko saioen ziklo berri bat inauguratu zuen egiazko proiektuak erakusteko, non ezagutza zientifiko-teknologikoa eragin ekonomiko eta soziala duten irtenbide berritzaile bilakatzen den. Patxi Alija Adimen Investigación enpresako zuzendari nagusia da eta merkatuen ikerketaren eboluzioaz eta kontsumitzailearen jokabidea ulertzeko azaleratzen ari diren teknologiek –errealitate birtualak, sentsore biometrikoek edo adimen artifizialak- duten eraginaz hitz egin zuen.
Alijak analogia bat aipatu zuen: arrantzale profesionalak ezagutzen ditu ibaia, testuingurua eta arrainen portaera eta enpresek ere kontsumitzaileen egiazko beharrak ezagutu behar dituzte marketin-arloko erabaki estrategikoak hartzeko. Merkatu-ikerketak behaketa eta zuzeneko kontsulta konbinatzen zituela azaldu zuen, ohiturei, pertzepzioei, motibazioei eta emozioei buruzko informazio fidagarria lortzeko.
Hamarkadetan zehar ikerketa horiek inkestetan eta elkarrizketetan oinarritu ziren batez ere, baina sektoreak eraldaketa handiak izan ditu: 2006-2010 aldiko lineako inkestetatik 2011-2015 aldiko neuromarketinaren boom-era, automatizazio eta ikerketa bizkorretik igarota, zeinak gaur egun, adimen artifizialaren garapenarekin batera, sektorearentzako zeruertz berria markatu duten.
Alijak aurkezpenean kontatu zituen Adimen-ek gailuen erabilerara egindako lehenengo gerturatzeak, esaterako, eskumuturreko biometrikoak edo bularreko zintak, bihotzaren gorabeherak neurtu ahal izateko. Lehenengo esperimentu horiek, ordea, etsigarriak izan ziren muga teknologikoengatik; hala ere, baliagarriak izan ziren etorkizuneko aukerak aztertzeko: zuzenean galdetu gabe emozioak neurtu, mugimenduak monitorizatu edo patroi fisiologikoak aztertu.
Inflexio-puntu handia Osasundata lankidetza-proiektua izan zen, Hazitek-en esparruan finantzatua, Adimenek enpresa teknologikoekin, osasun-arloko enpresekin eta Euskal Herriko Unibertsitatearekin batera hartu zuen parte. Helburua: gailu eramangarrien bidez pertsonak monitorizatzeko tresnak garatzea eta AA erabiltzea zahartzeari lotutako beharrak eta arriskuak aurresateko.
Proiektu horri esker Adimen enpresak datu-bolumen handien analisian zuen esperientzia indartu zuen, giza portaera eta egokitzapen teknologikoaren ulermena areagotu zuen eta esparru etikoak eta arauzko esparru aurreratuak txertatu zituen, zuzenbide-arloko unibertsitateko adituekin lankidetzan aritzeari esker.
Osasundatako esperientziak lankidetza berriak ekarri zituen, errealitate birtualean espezializatutako Innovae edo Veris Behavior enpresekin, esaterako. Ondorioz, inguru digitaletan diseinatu zituzten supermerkatuak, botikak edo merkataritzako guneak eta horiei esker kontsumitzaileak agertoki errealistan sartu ahal izan ziren eta erosteko erabakiak irudikatu, plataformak beren portaera osorik erregistratzen zuen bitartean: ibilbideak, begirada non finkatu zen, hartutako produktuak, linealekiko interakzioa eta erosketako azken orga.
Salmenta-puntuaren “biki digital” horri esker, denda errealak alteratu gabe esperimentatu daiteke, kostuak murriztu, alborapenak saihestu eta merkataritza-arloko ikerketa bizkortu. Sistema horrek behaketa, elkarrizketak eta ondorengo inkestak konbinatzen ditu adierazpenak ere jasotzeko: partaide bakoitzak sentitzen duena eta interpretatzen duena.
Hainbat urtez garatu ondoren, Adimenek bere plataforma du –estatu mailako aitzindaria– eta enpresek beren inguru birtualak sor ditzakete errealitate birtualeko betaurrekorik gabe eta esperimentuak modu autonomoan diseina ditzakete. Hasi produktu berrien testak egitetik eta prezio-aldaketa simulatzera arte, baita sustapenak eta salmenta-puntuaren diseinua ere; tresna horrek analisi errealista, irisgarria eta jasangarria eskaintzen du eta Espainian nahiz Latinoamerikan ezar daiteke.
Web-mintegia ixteko, hamar urteko eboluzio honetatik Adimenek lortu dituen ikaskuntza estrategikoak aipatu ziren:
- “Posibilismotik” berrikuntzaren planifikazio egituratura igarotzea.
- Enpresekin, zentro teknologikoekin eta unibertsitateekin lankidetzan aritzearen aldeko apustua egitea.
- Hasieratik analisi etikoa eta arauzkoa txertatzea.
- Teknologia eskalagarria garatzea, merkatuko egiazko erronkei erantzungo diena.
Webinar osoa:
